قصيدة بالشاعر فايز إبراهيم الغيثي أخو سلمى:
فايز يفزّ القلب فزٍ على فزّ
يفزّ فزّة فوزٍ بشوف فايز
فزّ الحشا من فزّته فزّ وأنهزّ
من فزّته هزّت حياتي هزايز
من فزّ من طرياه همّي أنجّزّ
شغلي ومشتاقٍ لناسٍ عزايز
شلت الشماغ وبالمراية ترززّ
وخطفت مفتاحي وكل العوايز
ثم قلت ياموتر على دارهم دزّ
دار الكرم والطيب فيها كنايز
كنّه عرف مقصودي الموتر ونزّ
وفي شارعه صدفه فتحت القزايز
شميت ريح البن والهيل والعزّ
بالشارع ويمكن على الحي جايز
بابٍ مشرّع مايبي طق أو كزّ
عرين منهو للمغانيم حايز
يامتعب دلالك على النار والقزّ
والله ما ترتاح بيدين فايز
قومه ترى راس العدو جزته جزّ
وياما كلوا ببطونهم من جنايز
وهذي معاميلٍ على النار ركّز
وهذي علوم للنعم هي حوايز
يومن ولد اللاش بالعيب غرّزّ
فايز بلا أدبال شقّ الغرايز
ويوم الردي للطيب ماذاق أو مزّ
الطيب والعزّة بدمّك لزايز
ياشوق غروٍ بالجدايل تهزّزّ
اللي على المتنين تزهي طرايز
بنت الشيوخ اللي بالأبشات ترتزّ
من جدّ جدّه شيخته بالركايز
حيثك عزيز وطينتك دوم تنعزّ
وتراب رجلك عزّ من عزّ فايز
لا يابعد أمريّح النار والقزّ
معزتك بالنفس مثل الغرايز
ولو أمدحك دومٍ الأبيات تعجزّ
شعري مقصّر لو معاها جوايز
والله ماني هايب الدهر لو لزّ
دامك عضيدي بالرخا والهزايز
ولا همّني من لامني كلهم (طز) !
هرج الردي دايم على الدوم بايز!
** فرد الشاعر فايز إبراهيم الغيثي بهذه القصيدة:
تبي الحقيقة يا ساير الرماحي
قصيدة الشاعر فايز إبراهيم الغيثي بالشاعر ساير الرماحي:
قال الذي دايم قصيده معوز
روابعٍ من نبع جاشي جهايز
الفكر دار ودرّ وافترّ وانجز
قافٍ يسلي من دموعه طرايز
من عيلمٍ يروي ضما كل مهتز
جبت الجواب اللي بمعناه عايز
سلطان تكفى هات الأوراق واجهز
اكتب وأنا عمك بيوتٍ عزايز
أكتب وأنا اعطيك القصيد المطرز
من عيلمٍ فيه القوافي جهايز
سجل جواب الشاعر اللي به اعتز
راع الوفاء نسل الرجال العزايز
ساير يسر وسيرته دوم تبرز
ومن بين كل الناس للطيب حايز
ساير وساير يشهد الله معزز
ومن روس شجعانٍ " لشمر ركايز"
ربعٍ لهم بالطيب علمٍ مبروز
بافعالهم عند النشاما عزايز
بهم الفخريكبر شموخه ويغتز
صوارمٍ ماهم عفون ولزايز
عز الذي يلوذ فيهم ويلتز
الكل منهم له علوم ونجايز
(دخيلهم) يطيب حضه ويعتز
يرقد وقلبه ما تجيه الهزايز
القلب يا ساير من أبياتكم فز
ياللي صدي شعرك رفع حظ فايز
صداقتك هي مكسبي دمت بالعـز
الله لا يجعلك تعتاز عـايز
لـك أرفع البيضاء بياضه مركز
وتستاهل أكثر لو يقال متحايز
يفداك لاشٍ للنواميس ما احرز
اللي حياته دوم بين العجايز
(تبي الحقيقة) عن وفاء مثلك اعجز
وأيضاً بعد قافه مع اخوك طايز
قمت ابترم في مجلسي وآترزز
زايم ولكن دون زومي حجايز
تمت وبختامه عساك اتجوز
وتاخذ هواك وله تسوق الجهايز
