قـصـائـد الـمـعـانـاة

يابو فهد لا تسأل الصدر وش جاه..

 إسناد إلى الأخ / سعد بن فهد الهمزاني..

يابوفهد لا تسأل الصدر وش جاه

ـــــــــــــ  وقتٍ عبوساً قمطريراً ومرّه

امسيت بين الهم والغم والآه

ـــــــــــــ والحالة القشرا مهي مستقرة

ابسألك هالصبر هو وين نلقاه؟

ـــــــــــــ راحت حياتي انتخي وآتشرّه

والوقت شين وذوّقن حر شلفاه

ـــــــــــــ وأنا وحيدٍ بالعنا والمضرّة

مافادني طيبن ورثته ولا جاه

ـــــــــــ (عقب ابو ساير) صار بالأمر فرّه

صالوا علي (خدّام جدّي ورعياه)

ـــــــــــــ وتوقدت بالقلب حرّه وحرّه

ومن عقبها حتى حياتي بليّاه

ـــــــــــــ ولله در الموت لله درّه

//////////
لا تخلّيني ..!!

كانـك نويـت التـرحّـل لاتخليـنـي

ـــــــــــــ من لي ليـا شـدّت ضعونـك وقفيتـو

من لي ليا سال دمعي من حجر عينـي

ـــــــــــــ وأنــا أوادع مواتـركـم ومريـتـو

يا جرح جـرح الفـواد اللـي مشقّينـي

ــــــــــــ لامن مسـك ( جمسكـم ) دربـه ولفيتـو

ماترحمـو علـةٍ وسـط الشراييـنـي

ـــــــــــــ ماكـن لكـم عاشـقٍ بالـدار بكيتـو

وقت المغيـب الـذي بالـدوم يبكينـي

ـــــــــــــ لا يالغوالـي بحالـي ويـش سويتـو ؟

ازعج لكم صـوت قلبـي يالمحبينـي

ـــــــــــــ وياليت مـن دم قلبـي لـو تقهويتـو

لـي قلـبٍ اقفـى معاكـم مايدانينـي

ـــــــــــــ مـا عافكـم لونكـم منّـه تبريـتـو

تكفـون تكفـون امشـو بالثمانيـنـي

ـــــــــــــ وياطيبكـم لـوّ عنهـا زود هديـتـو

تكفون معكم حبيبي بعمـر عشرينـي!!

ـــــــــــــ والله ماحلّكـم لــو إن توفيـتـو!!!

وإن ماحصل وصل منكم باقرب سنيني..

ـــــــــــ  فالبال مرتاح ( كان أنتـم تعافيتـو ) !!!

/////////

عذيريبه صليبٍ برقبتها  !

أنا برتاح من كل المصايب

ـــــــــــــ   وابهجر هالبعايد والقرايب

وابرحل عنهم لدارٍ بعيدة

ـــــــــــــ ديارٍ دونها كل النشايب

ديارٍ ماوصلها أي منهم

ـــــــــــــ ولا تطري على بال اللبايب

ديارٍ داخله وسط الأعاجم

ـــــــــــــ يهابه كل مسطورٍ وهايب

غريبة ممتعة جنة بعيدة

ـــــــــــــ ولا حافوا بها أهل الركايب !

وفيها كل ماتبغيه نفسي

ـــــــــــــ هواها.. أرضها.. دار العجايب!

أبستانس بها كل الإجازة

ـــــــــــــ ثلاث شهور وسط أرجاه ذايب

وأبا آقفل وأبقطع أتصالي

ـــــــــــــ كأني ياولد ماني بآيب !

ولاهمّن من الأخبار حاجة

ـــــــــــــ ولا فكرت في سِلم وحرايب

وأفل حجاج وأنسى كل هابي

ـــــــــــــ ومعهم كل قرم وكل خايب !

نسيت الكل وأولهم همومي

ـــــــــــــ نسيت الخلق من طفل لشايب

نسيت الناس كلّه أجمعيني

ـــــــــــــ سوى عودٍ سكن تحت النصايب..

هذاك اللي عجزت أنساه والله

ـــــــــــــ وإلى هالحين ودموعي سكايب..

ولا اذكر غير نفسي وأعذروني

ـــــــــــــ أخوكم ينقصه خلوة حبايب !

هذيك أم العيون الزرق عنقا

ـــــــــــــ هنوفٍ ضحكته برق السحايب

عذيريبه صليبن برقبتها

ـــــــــــــ ولبسٍ يترك الزهاد ذايب

مسيحية من المارون طرقا !

ـــــــــــــ ولو أن أرتباطه بي صايب !

وهذا ياولد قول الشريعة

ـــــــــــــ مهو قول لمصففة الكذايب !

مشينا بالسهول وبالمراعي

ـــــــــــــ وتسابقنا على خضر الهضايب..

قطفنا الياسمين اللي عشقنا

ـــــــــــــ وسمرنا بالجداول والهبايب..

وجلسنا تحتنا الينبوع جاري

ـــــــــــــ وتناسيت المصايب والنوايب..

جلست بدارهم تسعين ليلة

ـــــــــــــ وتهت هناك مع كل الطرايب..

غسلت هموم نفسي من عروقه

ـــــــــــــ وبدلت الحبايب والصحايب..

ألا يانفس جوزي عن همومك

ـــــــــــــ وخليني أعيش بلا ( قرايب )

قسم بالله ماحنيت لله

ـــــــــــــ ولاني يمهم بالشوق آيب !!

هذاك اللي جرى واللي لقيته

ـــــــــــــ بدار يحكمه ريّس ونايب !!

ولامني رجعت لدار همي..

ـــــــــــــ نسيت اللي جرى وعودت تايب !!

///////////
الشارع الجنوبي..
 

بديـت أسهـر ليلتـي.. والشـارع الشرقـي سـكـون..

ــــ ولاّ الجنـوبـي لا نظـرتـه.. بــان هـمّــي وتـعـبـي..

لأنـي عرفتـك فيـه يــا روح الأمـاكـن والسـنـون..

ــــ فـي صـورةٍ كنّـك تقـول اليـوم هـل مــن معجـبـي؟

والصـورة اللـي باقيـة مـنّـك بقلـبـي.. يــا جـنـون..

ـــــ كنّـك تقـول لهـا المـلا.. مسكيـن يـا مـن لـدّ بــي..!

الصورة اللي لزّمت تبقـى وسـط صـدري قـرون..

ــــ والنور.. حتى النور.. لا أقبـل.. تجـي معـه تحبـي!

ماني موصّف صورتك.. لأن العقل .. مهما يكون..

ــــ مـلـزوم لــه قــدرة وحــدّ يطـيـح دونــك يتعـبـي..!

يا مـن جعلـت الكـون مالـه فـي حياتـي أي لـون..!

ــــ يا ملخبط حروف الهجا.. والشرق عقبك مغربـي..

يـا مـن جعلنـي عالـم بعلـم اللغـة.. وكــل الفـنـون..

ـــــ وعلـم المعانـي والبيـان.. وكـل فصـاحـة يعـربـي!

كلـه علـى شـان أحـمـل الألـفـاظ يـمّـك يالحـنـون..

ـــــ وأفصّـل الألفـاظ قـدّك.. فــي مقـامـك.. يــا ظـبـي!

ليتك تجـي يمّـي عقـب طـول التجافـي والسنـون...

ــــ  وأسلّمـك قلبـي غــلا.. وأقــول أبـشـر وشتـبـي؟!!

//////////
لا نامت عيوني ولاني غاسلٍ يدّي وأتوب !

مدري علام الوقت ماهو مثل مانا خابره؟

ــــــــــــ هو ليه دايم ـ من زمن ـ معطيني الوجه الشحوب؟

هو ياترى ؟! جته الحضارة.. والتطوّر ساحره؟؟

ــــــــــــ أو هو مراهق!! ماتعرفه جدّ !! هو دايم لعوب؟

مشيت في رجلي بدنيا والشوارع ماطرة..

ـــــــــــــ ثم لفّها ليل الدجى..بسكون ما فيها هبوب..

ما هالشوارع هي مثل ما اذكر أنا للعابرة..!

ــــــــ ما فيها من يكسر سكون الليل.. من عقب الغروب !

لا يازمن.. أذكرك أنا فيك العذوبة ظاهرة..

ــــــــ وش صار قلّي يازمن؟ أو هو تغيّر في القلوب؟؟!!

المشكلة أني معك .. مجبور عيني ساهرة..

ــــــــــ لا نامت عيوني ولاني غاسلٍ يدّي وأتوب!!!!

شفني أنا جالس ومتحرّي عذابي لآخرة..

ــــــــــــ لامنّ كلٍّ جهّز الغفوة لعينه للهروب..!!

شفت العجب!! أعرف شقاي.. وفوق هذا ناطرة!!

ـــــــــ صدّق تراني صادق ولا جابني رجلٍ كذوب !!!

///////////////