جبل جبل والوقت هذي مزاياه
قاسي يبي قاسي كفى الله شره
جبل جبل والوقت لو جا من أقصاه
كتفك يشيل الحمل لله دره
حرٍ ولد حرٍ وأول وصاياه
لا تطيح وسهيل اليمن في مقره!
خلك على الهقوة وهمك تناساه
واكفخ بجنحان السعد للمجرة
والوقت لو ناشك بسيفه وشلفاه
لا بد ياتي لك على الوقت كرّه
صنديد دربك صعب صلبٍ على ارزاه
حلحيل حلوٍ مر للضد مرّه
سطام لطامٍ لمن عال وادناه
عندك.. واقصى العلم بايديك فرّه
خصّام قصّامٍ لمن شذ مرباه..
اعنان عسافٍ لمن بان ضرّه..!
يا ساير الليفي وساير تنخّاه
وأنت البراد وبيدك النار حره
عينك لهب شرار نارٍ تورّاه
حكيك ذهب غالي لزومٍ تصره
يدك مطر غيثٍ ملا بيدنا ماه
كريم ديم وماطرك به مسره
عزيز نفس وعزتك كنها جاه
أمير قومٍ والشرف بك مقرة
لا باس يا ساير وأنا الصبر لولاه
لاتشوفني والآه مبطي أجره
باقول لك شيٍ ولا عاد تنساه
أنا معك بالوقت خيره وشره
